الروشتة الإلكترونية
يعني إية روشتة إلكترونية؟؟
يعني المريض لا مؤاخذة يروح المستشفى ببطاقته الشخصية
يروح الدكتور كاتبله روشته عالهوا (يعني في السنتر بتاع الروشتات اللي فيه بيانات المرضى و أدويتهم و تاريخ حياتهم من يوم ما أمهم خلفتهم)
ييجي المريض بسلامته من أي صيدلية يحبها و يصرف روشتته بس لما يوريهم بطاقته.
لا في روشته ورق و لا بقى هيصة بتاعة زمان.
و كمان التفاعلات بتاعة الأدوية مع بعضها بتبان للدكتور و الصيدلي عشان لو في دوا غلط نلحقه على طول.
دا المشروع اللي ماشي دلوقتي هنا في فنلندا.
في مصر بقى الروشتة الزلنطرونية
يعني إية؟
يعني الدكتور (تخصص ميكانيكا و تغيير زيت و أطفال و نسا و حلاق صحة بالليل)
يكتبلك روشته موصيها عليه مندوب زلنطحي زيه فيها فيطاميناط و مواد مريخية بيعجنوها في مصانع مش تحت بير السلم
يا ريت لأننا بنتطور فدلوقتي في مصانع فوق البير و عادي بقى و بتاع.
فالمريض يروح يشتري دوا مشكوك في أساسه و ملعوب فيه ميت مرة.
و فوق البيعة الفيطامين اللي بيلعب بيه في الطين.
طبعاً معظم المصانع بتعبي الدوا بالكوز و حلل بتاعة الست أم محمود جارتهم.
فتلاقي المريض ياخد مضاد حيوي ممكن يكون دقيق و نشا مثلاً.
أنا أعرف أربعة أصحابي من علوم متخرجين و كل واحد دلوقتي دكتور و بيخترعوا مراهم و كريمات و بيبيعوها مع نفسهم و عاملين شركة بقى يا دكترة.
مراهم إية بتشفي كل حاجة!! كل اللي عندك تدهن من المرهم دا تخف و تجري زي الحمار الحصاوي.
دا غير الصيدليات اللي أصحابها بقالين و صنايعية شاطرين و مدرسين و عواطلية بس بيقروا الروشتة صح!!.
و غير قنوات البردقوش و الطب الذري و العلاج بالهجامة و الرقية الفرعية.
و شيوخ (مصابيح الدجى) اللي هما بينوروا و هما ماشيين عشان المعجزات اللي ماشية دلوقتي.
بس هوا النور بتاعهم موفر للطاقة و لا لأ؟
دا اللي نفسنا نعرفه!!!!
و البطارية بتقعد قد إية قبل ما نحط الفيشة تاني؟؟
هيصة و مولد يا جدعان و الله!
حبيبي يا أبو سعدة يا غالي.
مات في حقنة توكسفين مخترعها عجلاتي عنده صيدلية شغالة.
ههههههههه , مفيش أمل مفيش فايدة
ردحذفبالشفا ان شاء الله