كان في قديم الزمان حينما يصاب الطفل بالإمساك يقول له الأهل و بخاصة أمه "عاوز تعمل إإح؟" فيجيب الطفل و الدموع في عينيه و هو يزوم بشفتيه و يهز رأسه أن نعم.
أعتقد و الله أعلم أن الشعوب العربية و الشعب المصري خاصة في حالة الإإح منذ فترة ليست بالقصيرة
فأنت تكاد تصاب بالجنون مما ترى!
إسمع يا عمي مثال صغير
إمبارح وصل جوزية المدرب الجديد ـ القديم ـ للنادي الأهلي و بشروط لو طلبها من أي نادي أوروبي لتفوا في وشه عدل و لكن العبطاء و البلهاء عندنا وافقوا.
الرجل الذي حين رحل عن الأهلي كتب معترفاً و قائلاً حينما تكون أعور في بلد العميان فأنت ملكاً.
و قال على المصريين مهرجلين و غير منظمين و من الآخر زبالة.
المدرب العادي أو حتى فوق العادي هل يستحق تمانين ألف يورو شهرياً؟؟؟؟؟
تمانين ألف يورو يا أولاد الهابلة؟؟؟
لا مؤاخذة دا أنتوا ممكن تجيبوا أوباما يدرب بتمانين ألف يورو.
و البلد مليانة بشر ممكن تتعلم و تدرب بأكلها و شربها و مكان البيات و بس.
خلينا نحكي لكم مثال مع الفارق طبعاً
نوكيا اللي هي بتاعة فنلندا و اللي هي شركة عملاقة في المحمول.
كان مدير الشركة اللي هوا بدأ معاها من الأول بعد ما ظهر الآي فون الراجل ما عرفش يحافظ على وضع الشركة و فضل خمس سنين يهبل و ضيع وقت كتير من الشركة و خسرها مبالغ كتير و منافستها على المراكز الأولى.
الفنلنديين دوروا الأول كويس في بلدهم و هما يا حسرة خمسة مليون بني آدم لما ما لقوش حد هيعرف يدير الشركة بعد الراجل بتاعهم من بلدهم راحو جابوا واحد من برة بس بأية بقى بشروطهم هما!
و من ساعة ما الراجل مسك الشركة و هما قارفينه مقالات و عملت إية و طورت إية لما الراجل قرب يكفر منهم.
و جابوا مين يا معلم الراجل اللي مطور الأوفيس بتاع ويندوز، راجل مجرم و فاهم السوق و عفريت.و أعتقد مش هيبقوا عليه أول ما الشركة ترجع تقف على رجلها تاني هيقولوا له ألف شكر و سلاموا عليكم.
هنا بقى في مصر عاملين زي اللي العفريت بيطلعلوا في الخرابة و لا مؤاخذة العفريت قل أدبه معاه حبتين و برضه مصّر يروح الخرابة تاني.
يا جدعان في ناس بتتنشق على فرصة و البلد مليانة تقوموا تروحوا تجيبوا واحد ياخد مرتبات ألف شاب في الشهر الواحد.
و عشان إيه دا كله؟
المشكلة إن الشعب بقى عبيط و الناس بقت تافهة حقيقة لا جدال فيها
ضيعوا الناس الله يخرب بيوتهم.
لا في تعليم و لا حد بيعرف يقرا ما هو لازم يحبوا الكورة و يعيشوا اللحظة
و يبقى هوا دا الإنتماء .
و يبقى شوية تسابيح و صلوات سريعة تيك أواي تطهرك و إنتا في الآخر لا رحت ولا جيت.
هو دا الشعب اللي عمل السد العالي؟
هو دا الشعب اللي عبر القناة؟
هما دول دلوقتي اللي بيغششوا ولادهم في كل الإمتحانات و بيقفوا على باب المدرسة عشان يضربوا المدرسين لو ما غششوهمش.
هما دول اللي إبن الدكتور في الجامعة بيتخرج أستاذ دكتور و هو لا يفقه شيء في البطيخ.
لما تتفرج عالناس برة تتجنن من التطبيقات و الإختراعات اللي عمالين يطلعوها كل يوم حتى ماعدش كل يوم
بقت كل ساعة و كل ثانية.
و إحنا في بلاد الإإح لا عارفين ننزل الإإح اللي مضايقانا و لا عارفين نعترف إننا حمير.
حتى الحكومة في حالة من الإإح الجامدة
تحس إن الناس كلها مزنوقة بس مش عارفة تصّرف
ربنا يفك زنقتكوا يا شعب.
د.سعيد الفقران
كاتب أرزقي
الكلام ده لما يكون فيه شعب عارف هو مين وماذا يريد وما هي الوسائل الممكنة لتوصله لما يريد .
ردحذفيعني يكون شعب براجماتي ( يعني عملي - واقعي ) من المفروض اننا نسيب الكورة اصلاً ونشوف احنا عيزين ايه في حيانا السياسية الاقتصادية والتعليمية الصناعية . . حتى نصل الى الطور الحضاري المنشود .
دول شعب فوزية البرجوازية يا مولانا ..